ZUNGAYENZ’ IHLAYA
Kwakungelula kubuhlungu kwakungemunandi,
Kunzima ziphuma zigobhoza ngisikhihla nesikaNandi,
Beqebekula bededelana emalibeni,
Kungelula ngithule nanoma ungafika namangaki amanandinandi,
Konke ngizokuzwa kungemunandi,
Ngiyakucela uzungayenz’ ihlaya neyami.
Bebetetemuka kuwudali nosthandwa,
Ubusuku bebukhonzile belala mihla ngemihla,
Ngekusasa bengenalo uhla,
Babengalindele kwaqhamuk’ ababengakulindele maqede baphenduk’ ezidukelene,
Wafika komunye usathane, ongenacala wakhetha ukuwushiya ngale,
Uzungayenz’ ihlaya neyawo.
Uvuka njalo ekuseni ahlambe ngawowodwa,
Akasenandaba nokushaya ngazozodwa,
Akanaye umngani angithi bayamuyek’ ahambe yedwa,
Emuzimbeni uhlezi ezofika ngazozodwa,
Kodwa, elokuloba usiba akalikhohlwa noma lilodwa,
Uzungayenz’ ihlaya neyakhe.
Ubephuthuma etohweni, ngayizolo kad’ esesontweni,
Eqala nokulithola evikini, usephenduke kohleli kwesinamasondo etshwaleni,
Ngoba okudalwe ngophezulu akusoze kwajikwa noma singaguqa sibheke phezulu,
Sithandaze sicele kophezulu,
Okuhlelwe nguye kuyimfihlakalo yezulu,
Akukho esingakujika noma sesisebenzisa izilimu zezulu.
Hlaya kalihlekisi,
Nanoma kawumazi ungamulahlekisi,
Mhla ngiyihaya ungazenzisi,
Kwazi bani, hlampe uyothi ‘Nhlakanipho ngiphe iduku angeke ungishiye ngilusizi’,
Neyakho angeke ngiyenze ihlaya,
Zungayenz’ ihlaya.
uNhlaka-imbongi-sikhakhane
Ukunqamukelana
Kuyobakhona ukunqamukela kwezinto ezimbili,
Wake waphuka? Sengisho ilunga lomzimba, khululeka noma kubuhlungu kodwa akufani ncamashi,
Kuyobakhona ukuhlukana kabili,
Abake bahlukana kwezothando kulokhu bazofakaza ngelithi,
"Noma sake sabuzwa ubuhlungu benhliziyo kodwa, lobu sesibuzwa okobugcina kabi”,
Wake wadlala wahlulwa? wangaphumelela bakuhleka?
Wazizwa uphoxeka nozokududuza unethemba lokuthi uzofika?
Lanake kuzobe kungadlalwa,
Ngoba,
Kuzokujampela,
Uzoluza ukuthatha impilo,
Noma ngabe ulinono,
Oyobe ukusebenzisa kuyosala othulini,
Ngalowo mzuzu uyofika okungokwakhe ngiyakuthembisa uyohamba nakho,
Dadewethu mfowethu kulokhu kuzobe kungadlalwa,
Noma bezama ukuzensisa, kulokhu ngampela ngeke bakuhleke bazokhala,
Kwabazoduduza kwelakho ikhaya bazogcwala,
Abanye ngeke betshelwe bazobonakala sebetheleka,
Uyakhumbula ngaleyankathi uphumelela?
Ngiyathemba usuyakhumbula kwabakhona idlanzana elalithi “HALALA,”
Kodwa manje kwezomuqhafazo iningi lizobe selithi “WALALA, NGOKUTHULA, LALA,”
Bosala bekhala wena uyobe usunokuthula nokwenama,
Ngoba,
Kuzokujampela,
Uzoluza ukuthatha impilo,
Noma ngabe ulinono,
Oyobe ukusebenzisa kuyosala othulini,
Ngalowo mzuzu uyofika okungokwakhe ngiyakuthembisa uyohamba nakho,
Ngizokutshela nje,
Ungalinge ungibuze ukuthi ngiyazi kanjan’ intenje,
Kodwa engizokusho kunjalo nje,
Noma ngingazi kahle kodwa, mawenze kahle owakho umphefumulo ngesivinini uyokweqa amathafa nezintaba,
I-Jerusalema umuzi okhanyayo uzobe sewubonakala, phela,
Ilaph’ oyobe uphikelele khona,
Nenhlokomo kukhuzwa uwosana iyobe isholo phezulu,
Ngalokho wena nokhokho bakho uyolingena izulu,
Bayeke laba basemhlabeni abathi shiyaphans’ isintu,
Abakithi asebalala sebebabiza ngamadimoni,
Azulazulu emkhathini phezulu,
Nabo abazi ngoba lonkulunkulu wabo bamukhomba phezulu,
Kuyobakhona ukunqamukelana phakathi kwenyama nomphefumulo,
Okukodwa kuyosala emhlabeni okunye angeke ngisho ukuthi kuyoya phezulu kodwa, kuyothatha indawo yako,
Ngoba, yazi ukuthi,
Kuzokujampela,
Uzoluza ukuthatha impilo,
Noma ngabe ulinono,
Oyobe ukusebenzisa kuyosala othulini,
Ngalowo mzuzu uyofika okungokwakhe ngiyakuthembisa uyohamba nakho,
uNhlaka-imbongi-sikhakhane
UTHENA “NHLAKANIPHO NGICELA UBHALE NGINODABA”
Ngibe sengibuza ukuthi ngiluxube yini?
Ngizobhala nangesikhathi esimbi, kulungile yini?
Kwesinye isikhathi kuyajabulisa, kuyamamathekisa, kuyanamisa,
Zinsuku ezimnandi ziyafika zidlule angizukugxila kwezimbi ziyasabisa,
Uthena sekuyisikhathi wahamba abakebamubone bamukhomba kwaHlabisa,
Kwakumnandi sihleka izimpaphe zindiza ngazimbili sizifanisa nathi,
Ngaleyonkathi sasiyidlala siyiphinde neka-Nathi,
Basebazi wawungeke ungazi ngaye nami, wawungeke ubuze ngathi,
Mayekud’ engeke azabuye wayaye abike,
Mayengekho amasente wayaye azame awuthumele umuyalezo ufike,
Ukuvele ngimamatheke kwakuzifikela, ngaye kwakuhlezi kuseduze,
Ngangimuzwa eza kude ukuthi uzofika maduze,
Ngangingafikelwa um’zwangedwa, phela ngasosonke isikhathi bengimuthola,
Bengazi kahle ukuthi akekh’ ozomuntshotsha,
Bhala Nhlakanipho ukuthi,
Kwakungathi ngisebenzisa owesintu umuthi,
Angisoze ngawulibala nalowamuthi esasivamise ukuchibuka ngaphansi kwawo,
Awubheke sewasuswa nalowamuzi owawakhiwe kuleyandawo,
Kweyakhe inhliziyo imina owayenendawo,
Sengihlale ngaze ngayivusa lendaba,
Phela wahamba wathi masinya uzobuya,
Angizange ngidikibale noma ngisokole,
Nalapho engajika khona mhlazan’ ehamba sengifike ngime lizelishone,
Benginethemba lokuthi ukuzithoba nokuzithiba mhlampe lenhliziyo kuzoyenza iphole,
Ngize ngimthole okanye abuye sixoxe,
Nginethemba ubezochaza ngize ngixole,
Angisenakho engizokuxoxa,
Nomuntu engizohlala naye angishaye ngamancoko ngize ngifikelwe ukulala,
Nhlakanipho ngicela ungakukhohlwa nokuthi,
Ntaba zingumasithela zingisithela wena,
Ngiyafisa ukwazi ukuthi ubani lona ngezothand’ osekutshela,
Nakh’ ungabuyi kushukuthi lokubambile uzishaya isifuba,
Kaze ngiyolithola yini-na elinye ithuba,
Ukube uyangizwa bengizothi mangabe usangithanda thola intuba,
Uputshuluke ubaleke ngisekhona khumbula,
Selokhu wahamba angisabutholi ukuthula,
Eyokuxhuman’ angikakoyishintshi thumela,
Ngidinga ukuzwa ukuthi ngiqhubeke ngilinde okanye ngiqhubekele phambili,
Sebefike kabili babili,
Bobabili bangibuza umbuzo munye,
Bathi ngilindeni lesikhathi sesiside,
Ngiphendule ngithini? Kawubuye.
uNhlaka-imbongi-sikhakhane
WAYENGEVE
Wayengev' engaphaphile,
Naseskoleni wayaziwa ngenhlonipho, nezingan' eziningi zazingamazeli lutho nje,
Olubi nokubi, ezindlini zangasese wayeya ngoba eyozikhulula,
Ngenxa yephunga, wayengaboni kuyindawo enhle yokuzilula,
Kazi emakhaya zizokhoselaph’ izinkukhu,
Phela,
Umthunzi wazo sewaphenduka isivuno ngale usuyashunqa,
Kwakungekho bandl’ ayengakwenza,
Ngoba,
Wayengelutho nakolova,
Ngisho ngoba babeshova amaphepha,
Bebiza oRanger(K) bengenandaba nokuthi balibhala nini ele-Maths iphepha,
Ngakusasa babebuye beshove yena ebhodini,
Babezitshela ukuthi bayamuhlupha kanti bayamuthula espotini,
Nawe wawungaze umdabukele uzufise nokubathuka,
Kwakwizidlamlilo nokho, nothisha, izenzo zabo zazibathusa,
Esikoleni kwezobugebengu babengojikelele,
Ngaphakathi emagumbini okufundela babebuye bengabonwa,
Kwesinye isikhathi wawubagcina ekuseni befika,
Babengolova, ingakho naseskoleni babephinde belove,
Babengokhanda limtshela okwabo,
Iyangixaka lento ngoba babethi bazi konke,
Kodwa,
Bengumshungu ngasese baphelela lapho bonke,
Owayengaphaphile nokubukeka edelelekile,
Uyen’ osefika okok’bhema sebekucela kuye,
Kushukuthi eskolen’ ikhon’ ababekuyele,
Ngikhalela izandla zabazali ezazibaphethe,
Izinyembezi zabantwana phela sebeyimidlwembe,
Sebengosicuthe, ekhoneni langakwa-Left kusihlwa akusadlulwa
Nezingan’ estolo azisathunywa,
Nomphakathi usukhathele ibona,
Izinsuku zabo zibaliwe maduze bazovalelwa,
uNhlaka-Imbongi-Sikhakhane
KODWA ISIPHETHO NGUKUFA WEKHANDA LIMTSHELOKWAKHE
Ububi bomhlaba,
Baqala mhla eyekiswa ibele ngenhlaba,
Kwaqala kwabiliswa inhlama,
Wayengabazi waqala wabuhlaba,
Ohhe ngabazali owayebasaba,
Mabemutshela useyala, akasafuni nokubezwa,
Abanye babo useyabashaya,
Ngidinga ozohaya,
Hlampe lengane ingaqala maphansi kabusha,
Kekuyekwe ukuthi kunjenjenje ingenxa yentsha,
Asisebantu sesibizwa ngezinja,
Abanye babazali bethu kuthiwa abazalanga babola amathumbu,
Usefunwa zinkalo zonke nasendlini uyathukwa umzali kuthiwa ufuye isidumbu,
Kodwa isiphetho ngukufa wekhanda limtshelokwakhe,
Ungathinti lapho kuyashisa,
Ngaleyondlela ungahambi, ukuthi kukhonani ngeyakh’ indlebe izwisisa,
Ungumshungu nababi siyamtshel’ uvelethi asim’yeke ay’kabi,
Uzozwani kuthina bontanga phela ebusweni bakhe singompatha,
Mihla ngemihla siyamubhekisa okwethu ukushaya indiva uthi siyamubhayizisa,
Usewugejileke umgodi njengezinyane lenyoka uzozibonela simyekile,
Omama bamuthandazelile,
Endaweni ngaye abasafuni lutho sebecikekile,
Kodwa isiphetho ngukufa,
Uhlezi esitshel’ ukuthi usile, ngalolo suku ntang’ angek’ uzukubone nokusa,
Sesayeka nokudabuka,
Angithi konke okwenzayo uthi kuhle? Qhubeka ujabule,
Ngabe ngithi sizokubamba ngendlela usukude kakhulu thina kuwe sesingabasele.
Phambilini sikesani mana usuhamba kakhulu, ukewavuma?
Nhlaka-imbongi-sikhakhane
AKEKH' OFANA NAWE
Lasiphuma khona kukude,
Ubumuhl' ebuhleni bakho usasemuhle mina nawe bengithi s'yakude,
Kodwa ke ubungababekaphi abangane,
Besekukhala esabo isicathulo,
Ngizama ukuk'nqanda,
Ngenxa yokuk'thanda,
Inhlonipho Bengikupha,
Ngeminy' imini besigejana uvel' ukhule ubemude,
Noma bekunjalo akekh' ofana nawe.
Angazi,
Ukuthi ng'zothini? Ngempel angazi,
Besengazise nabazali,
Angisabaphathi abami abangani bebengeke bengasali,
Loludaba besengizol'dlulisela nakubaphathi,
Benkonzo mina nawe bengithi sizobajabhis' abathakathi,
Nabab'thaka ngathi ngaloludaba sebezosizakala,
Bazolulama,
Wangala,
Bengithi usaqhuba ukudlala,
Ubungev' uk'thanda bengithi usazohleka uthi sthandwa ngiyadlala,
Bengithi sisazohamba amamayela,
Besingawudingi no-oyela,
Uvele wangishiya esigangeni wangabheka nasemumva,
Bengingena sikorokorwana,
Kodwa bengingalibali ukukukhumbuza ngemumva,
Maduze usufunde ukungishiya kwesokunxele ngakwesokudla uvele waputshuluka.
Kuhle kwezingane besihlezi sihleka,
Simamatheka kuhle kolusanda kuzalwa usana,
Ubuthi sizozala inkosana,
Makungenjalo ibizofana nawe inkosazana,
Esam’ isibongo besingeke sisabalwa nesamakhosazana,
Akekh’ ofana nawe.
uNhlaka-imbongi-sikhakhane
IHORA
Elingaziwa ngumuntu, nguye qha,
Uphumekuseni eyetohweni, emphantweni,
Nasetohweni bebazi ukuthi usendleleni uyeza, kanti ekhaya bazi ukuthi uphumile, from work uzobuy’ ezekhaya masekushone nelanga,
Kanti akabuzanga elangeni,
Empeleni naye ubengazi ukuthi ngenamuhla ongaphezul’ uhleleni,
God sijabula sivevezela, siqaphile,
Noma singawathenga siwafake,
Siwabuke mihlangemihla kodwa, linye,
Ileli esingalazi,
Nasetekisini akabang’ asehla, nayo ayibang’ isafika,
Nobelale kujatshulwa, bheka akabang’ esavuka’
Obethembisa akabang’ esalulama,
Nobengakholwa esath’ uzovuk’ azithathe, lelothub’ akabang’ esalithola’
Nobekholwa ay’cha ngizwa kuthiwa besekushaye ihora,
Ihora?
Ilelohora elinzima nami liyangisinda, kunzima,
Unfortunately, nathi esikholwayo asilazi,
Ungababazi, sonke asilazi, ngoba nawe awulazi,
Ukuthi uyohamba nini? Awazi,
Mina kukhona engikwaziyo, thana ngikutshele, khawulalele,
Khawusebenze kusenesikhathi, kudala,
Hlampe mawuzwa ngami uzozwa ntanga,
Kwafik’ ababili kudala nami angisazi,
Kodwa endleleni ngifuna uqonde, angifuni uphambuke ungazi,
Ukuthi ukhona ongaphezulu, kawumaze,
Kawumdumise, mihlayonke kawthandaze,
No-God kawuthandane,
Makewubhekane naye,
NGOBA… IHORA
Elingaziwa ngumuntu nguye qha.
uNhlaka-Imbongi-Sikhakhane
Kanye_kanye
Nakanye, kusukela ekuqaleni sisabala sithatha ngakunye,
Angeke saphumelela kanye-kanye,
Singakhula ndawonye,
Sishizile, sibhekane nezimo ezinzima igama lithi sisonke,
Kwesinye isikhathi avekumnandi ukusebenza kanzima,
Eyakho uyiqale uzuyiqede indima,
Ngibabonile bebenza kahle,
Beza kahle,
Emabangeni aphansi kuya kwaphezulu bebeshaya kahle,
Baze baphumelela kahle, halala,
Asinazwi kowalala,
Kowadla... , ohhe ayikho eyobuthongo la,
Nami ngavuka ngazithuntutha,
Uphambili owashiya umendlalo,
Ngoba,
Wayazi ukuthi la akunamudlalo,
Wahamba kakhulu sakubalekela indlala,
Maduze wabuya wasilungisa isimo be-Busy bedlala,
Nakanye, singemadleb’ embongolo,
Angeke savela kanyekanye, Nomangabe kunjalo,
Oyongena ngalo, lufune olwakho udondolo,
Noma bengathi olwakini ukhondolo,
Phela banjalo mase zisibhedela izinto,
“Vele kubo akekho noyedwa owake waphumelela”
Bayeke, bajabhise vele bohlezi besho njalo,
Sukuma ubhukule,
Yazi kunabangemumva kwakho, ngiyazi ubungazi,
Kabanzi,
Nabo bayafisa ukufana nawe ngelinye lamalanga,
Usuyazi,
Kanye-kanye masingenza izinto ndlelanye,
Ukuthi ubani osefike masinya,
Masikushaye indiva sibemunye,
Phela, singephumelele Kanye-kanye.
uNhlaka-Imbongi-Sikhakhane
ZUNGALIBALI EMUMVA
Mzukul’ uzungalibal’ emumva,
Nxa usubona ukuthi kunzima phambili noma kufiphal’ icing’ ebhekemumva,
Ekhaya komama uzukukhumbule,
Mhla inkung’ emehlwen’ isikukhungethe uzungaling’ uyivumele,
Funda ukuzimela ungaling’ uncike kunoma ubani nabo ubatshele,
Lawo ngamazwi kanina kamama abamubiza uninakhulu kaNhlakanipho, ngukhulu,
Zazinginetha ngizabalaze ng’phumelele wayevamis’ ukuthi athi mkhul’ ongaphezulu,
Khula uyephambili mzukulu,
Ngiyobe sengingasekho abakwenu bayojabula kakhulu,
Uzungakhathazeki ngaleyondlela ngami,
Ng'yakhumbula esethi,
Mntanami, ay’suka mzukulu ngibuye ngikhohlwe kodwa vele nonke ningabami,
Mntanomntanami,
Bheka laphaya, thatha nans’ ebhalwe uwoli,
Ngangihleka maqede ngithi kwahle gogo usholebhalwe u-Holy?
Makufika ubunzima ubodla yona,
Endlini oyobe ukuyo ibekhona,
Makukuthi usuyathutha ngiyakunxusa ubogodla yona,
Noma sengiyobe ngingasekho ngokwenyama,
Ngiyobe nginawe nanini-nanini khumbula,
Emumva, uzungalibali emumva,
Ugadeke, noma uhlehla usize uzukuqaphele okuzokukhuba kwebhekemumva,
Angisilo ivaka, kepha langiphumakhona noma ningathinumsuka wam' ungemumva ngakho-ke ngizohlehla,
Ngiyakhumbula ngibuvuba, ngibukhama bubile maqede kuthiw' angithi kancane mande nginikibandla,
Bengithi mangithi ngiyaqinisa kwithamu kuthiwe kahle ngamandla wena usenekusasa,
Bebengikhumbuza ngakusasa,
Izimbiza nezinkambi sengisho ezikaFaro bebeth' angingazenz' isasasa,
Ngalesosikhathi ngangingakazi kahle kodwa babethi owesifazane ngingamenz' athembele kwelika SASSA,
Ukuyozama, bekumele kubonwe imina ukusa,
Noma ontanga bebethi kuhlwile kumin' angisophinde ngise,
Konke lokho bebezisholo bheka sengiyakubona ukukhanya ngenhlanhla sekuzosa,
Ngiphakathi nohambo, kwebhekemumv' angizukulibala.
uNhlaka-imbongi-sikhakhane
NGOBUTHONGO BESIKHASHANA
Kube ukugobisa izinkophe wasebona ukuthi seng’yalahla,
Kanti ukube ushilo ukuthi akusahlaleki useyahamba,
Bengingeke ngingamvumeli ahambe uma esengenakho ukwenama,
Usizileke ngoba nomnyango ushiye ewuvulile,
Akanakanga ukuthi ukhona ongaw’bon’ angen’ angithole ngisalele,
Bengiyibona yonke lento ngilele,
Bengithi uzongivusa athi salakahle,
Bengizovuka ngimange ngithi hambakahle, ndlelanhle,
Ngoba eyothando iyoshabalala ngobuthongo besikhashana,
Angeke ngisho ukuthi anginakanga,
Kodwa,
Wothi ngikukhumbuze: uyakhumbula uthi uyohlala ingunaphakade,
Ngikutshela ukuthi uyohamba kuyobe kungakasi eyethu iyobe isiphelile,
Ungiphikisa uthi ngiyaphosisa sisazohlala isikhathi eside,
Bengizihhemela eside isikhathi sengivukile,
SENGIVUKILE,
Ngeke ngisho ukuthi bamuthathile,
Uyena ohambile nami ngimvumele,
Bazomthatha ngiyazi phel’ angithi nami ngamfica ngamthatha,
Ngeke ngazi,
Hlampe nal’ ayephuma khona kwakunjalo kwazi bani,
Bengingezwa ngobani?
Ngobuthongo besikhashana,
Ngangisacwile phansi emthonjeni wothando,
Izimpaphe sishaya omuhle umkenenezo,
Umoya wawushaya kancane,
Namahlamvu mayehlephuka ewaphansi wawungashaya esihle isithombe lesi,
Wawungafunga engathi… ngangize ngikhohlwe nezangayizolo,
Ngoba ngakusasa zazikhon’ ezakhona.
uNhlaka-imbongi-sikhakhane
SISEMHLABENI OMAGADAHLABAYO
Lawukhona mawuke ubheke phans’ ubuke,
Ngaphambi kokuba ubhule kungemlil’ ophemb’we nguwe,
Phela ukube usenyam’ ihlangene nomphefumulo ngabe akunje,
Kuthi angihlale ngibheke ngakunina,
Angenzi lona phutha phela ngikhul’ ongenina engunina,
Angizukunifulathela ngizokhuluma nani bomama, bomama babantwana babayeni benu,
Bekuyini ukutshala uthando,
Uthand’ oluzothi lungahluma luthel’ ezinhle izithel’ oyothi nawe uqhuthule udle kuzo,
Lenzond’ oyifukamele izochamisela ingematshwele,
Uthi izibusiso mawuzithole kanjani ngenhliziyo ungemnene,
Bashonaphi labazali abathi “mina ngizokukhulisa njengowami umntwana”,
Phela kuqala lento yokuthi aw’vundlanga kwesam’ isibeletho yayingenziwa isasasa,
Kwakuphakanyiswa umntanami, nganeyami, wawungesabi nokulibiza elikamama ungamazi,
Wawuze ukhohlwe nowakuthwala mzukwana,
Kwesamanje isikhathi suku nosuku izinto ezenzekay’ usuyaye ufise nokuthi ngabekuncon’ usanyathela kulomagadahlabayo,
Abanye bethu sebephila ngokusaba,
Ababekezelang’ abanye bathatha intambo,
Abanye banesifiso sokuvela emakhaya kodwa ngenxa yesimo lutho,
Uyise okanye unina wayethi uletha umsizi nomduduzi kant’ ungenisa inyok’ uqobo,
Ekhula mihlangemihl’ abanye bethu sebaze badel’ amakhaya,
Njengomkhushulwa bayidedil’ indawo ezinhlizweni zobaba okanye zomama babo,
Nhliziyo yam’ iyabhibha kusobala lesilonda kunosihlokolozayo,
Ngicabang’ angiqedi, ngemicabango ngikude ngenqondo ngiyadlinza,
Amagam’ ayadlal’ athi mawaphume ngomlomo kod’ ayala,
Ngiding’ indleb’ ezolalela maqede ithumele umyalezo em’qondweni ophusile kodwangiy’tholi,
Ngizothatha usiba nepheshana ng’zobhala empeleni sengiqalile,
Mehlo thumeka phela iyona ndlela sekungabuye kwenziweni?
Siyokhetha kuliphi uhla wezinsizwa konakele,
Aboni bomakoti bethu bakusasa ibona laba abazishaya isifuba ngeziyisishiyagalolunye,
Singeke sibasole nabo kakhulu phel’ eyomuntu isezandleni zakhe,
Ungaze ungabasoli nxa sebelidikil’ elihle ikhiwane,
Lona ongaze ulithembe ngokuheha kwal’ okuhle,
Ibele,
Angithi alivuthwa nje ingob’ elendlela bashonjal’ abadala,
Bathi enhle igawulwa ezizweni, ay’suk’ akenizweni,
Mina ngithi omuhl’ ogotshwa usemanzi,
Uthungakhula namahlumel’ uwaqaphe ngelokhozi,
Ngihlangane nomntwana osenontwana, usengumzali lomntwana?
Ungilandise ngesigameko somntwan’ ohlulekil’ ukugcina usana,
Nizobafundisani abenu ningafundisekile nje?
Nihlulwa nawukumelana nezimo ezithile ninjalo,
Kusobal’ ezethu aziphephile kulezozandla ezinjalo,
Kodwa nathi sithembeni?
Angithi siya kubona ngetemu likazibanjwa zisemaphuphu,
Sikhohlwe ukuthi le inzalo yayizolo,
Aziyazi nemihuzuko zisaba nokuhaqwa nentewubal’ amazolo,
Bayephi ontanga?
Bahamba begaxela kuhle kwezintanga,
Phela kubo asisenazwi, sebesishaya ngelokuthi ngizokwenzani silingana,
Bathi bezalwa bebejahe lempil’ ephambili,
Bayakhohlwa ukuthi nabaphambili abenza njengabo sebefisa nokuqala kabusha,
Bebuyele kulusha benze kahle kungeke kusenzeka.
uNhlaka-imbongi-sikhakhane-2019
